Минтақавий платформа иштирокчи давлатларининг вакиллари учун семинар ташкил этилди

Жорий йилнинг 15-февраль куни Агентлик масъул ходимлари Ҳуқуқни муҳофаза қилиш академияси томонидан БМТнинг Гиёҳвандлик ва жиноятчилик бўйича бошқармаси Марказий Осиё бўйича ваколатхонаси ва Буюк Британиянинг Ўзбекистондаги элчихонаси билан ҳамкорликда ташкил этилган “Амалга оширилиши мумкин бўлган коррупцияга қарши сиёсат. Бизнесда коррупцияга қарши қонунчилик ҳужжатларига риоя қилишни рағбатлантириш” мавзусидаги семинарда иштирок этди.

Тадбирдан асосий мақсад Марказий Осиёда Коррупцияга қарши конвенцияни жадал амалга ошириш бўйича минтақавий платформа иштирокчиларининг коррупцияга қарши курашиш бўйича давлат сиёсатини амалга ошириш, коррупция ва хуфиёна иқтисодиётга қарши курашиш фаолиятини янада самарали қўллашдаги билим ва кўникмаларини оширишга қаратилган.

Унда мамлакатимиз ҳамда Қозоғистон, Қирғизистон, Тожикистон ва Туркманистон давлатларининг коррупцияга қарши курашишга масъул идоралари вакиллари (онлайн тарзда) қамраб олинди.

Маълумот учун: Марказий Осиёда Коррупцияга қарши конвенцияни жадал амалга ошириш бўйича минтақавий платформа БМТнинг Коррупцияга қарши Конвенцияси қоидаларини янада самарали амалга оширишга кўмаклашиш, бу борада минтақа мамлакатларининг ўзаро ҳамкорлигини мустаҳкамлаш ва ривожлантириш мақсадида 2023 йилнинг ноябрь ойида ишга туширилди.

Платформанинг ўзига хос вазифаларидан бири ўзаро ахборот ва таълим алмашиш, билимларни бошқариш ва минтақада коррупцияга қарши кураш сиёсатининг устувор йўналишлари бўйича келишувлар учун форум ташкил этиш, ҳамкорликни мувофиқлаштиришни такомиллаштиришдан иборат.

Иштирокчи давлатлар томонидан БМТнинг Коррупцияга қарши конвенциясини Марказий Осиёда жадал амалга ошириш бўйича Минтақавий платформанинг 2024-2025 йилларга мўлжалланган “Йўл харитаси” имзоланган ва бугунги кунда ушбу “Йўл харитаси”да белгиланган мақсад ва вазифалар ижросини таъминлаш бўйича иш олиб борилмоқда. Мазкур семинар ҳам ана шу вазифалар ижроси доирасида ташкил этилди.

Семинарда хусусий секторда коррупциянинг олдини олиш ва унга қарши курашиш, коррупцияга оид ҳуқуқбузарликлар учун жавобгарлик, активларни қайтариш ва халқаро ҳамкорлик стратегиялари, соҳага оид қонунчиликни такомиллаштириш, порахўрликка қарши халқаро стандартларни жорий этиш механизмлари каби муҳим масалалар кўриб чиқилди.

Мавзу юзасидан Буюк Британиянинг Лондон университети профессорлари, коррупция ва хуфиёна иқтисодиёт муаммолари бўйича илмий-тадқиқот олиб боришда бой тажрибага эга бўлган Муштак Хан ва Паллави Рой маъруза билан иштирок этди.

Коррупцияга қарши курашиш агентлиги

Ахборот хизмати

1134 162 Босма версияси

Korrupsiyaga qarshi kurashish Axborot xizmati 15.02.2024

• Ҳаволадан нусха олиш