Агентлик ва ЕХҲТнинг коррупцияга қарши курашишдаги самарали ҳамкорлиги янги йўналишларда ҳам фаол давом эттирилади

Жорий йилнинг 3 апрель куни Коррупцияга қарши курашиш агентлиги директори ўринбосари Умида Тухташева Европада хавфсизлик ва ҳамкорлик ташкилоти(ЕХҲТ)нинг Иқтисодий ва экологик фаолияти мувофиқлаштирувчиси Бакыт Джусуповни қабул қилди.

Мулоқот аввалида У.Тухташева давлат идоралари фаолиятининг очиқлигини баҳолаш бўйича “open.index” ҳамда очиқликка масъул ходимларнинг малакасини оширишга қаратилган “E-learning” платформаларини ишга тушириш, соҳадаги норматив-ҳуқуқий ҳужжатларни такомиллаштиришда ЕХҲТ экспертлари томонидан кўрсатилган амалий ёрдам учун миннатдорлик билдирди.

Шунингдек, томонлар ўзаро ҳамкорликни янги йўналишларда ҳам самарали давом эттириш масалалари, жумладан, 2025-2026 йилларга мўлжалланган режа ва мақсадларни муҳокама қилди.

Бу борада кенг жамоатчилик ўртасида коррупцияга қарши курашиш ислоҳотларнинг самарадорлигини баҳолашга қаратилган ижтимоий сўровлар, коррупция ва гендер, ёшлар билан ишлаш, ҳудудларнинг коррупцияга қарши курашишдаги салоҳиятини ошириш, фуқаролик жамияти институтлари, ННТлар билан ҳамкорликни кучайтириш, Коррупцияга қарши курашиш бўйича Виртуал академияси ўқув модуллари сифати ва имкониятларини кенгайтириш борасида аниқ таклифлар ўртага ташланди ва маъқулланди.

Учрашувда Олий Мажлис палаталари, хусусан, коррупцияга қарши курашишга масъул қўмиталари ва ЕХҲТнинг Парламент ассамблеяси ўртасида яқин ҳамкорлик ўрнатиш, ташкилотнинг қўшма лойиҳалари ва нуфузли тадбирларида Ўзбекистон томони иштирокини таъминлаш таклиф этилди.

Мулоқот якунида Б.Джусупов мамлакатимизда аксилкоррупция ислоҳотлари самарали амалга оширилаётганини алоҳида эътироф этган ҳолда ЕХҲТ соҳадаги таклифларни қўллаб-қувватлашга, Агентлик билан бундан буён янги йўналишларида ҳам фаол ҳамкорликка тайёр эканлигини маълум қилди.

Коррупцияга қарши курашиш агентлиги

Ахборот хизмати

1311 114 Босма версияси

Korrupsiyaga qarshi kurashish Axborot xizmati 03.04.2025

• Ҳаволадан нусха олиш