Техник тузатиш: Агентлик томонидан бугун эълон қилинган рейтингда Х.Сулаймонова номидаги Республика суд экспертизаси маркази техник хатолик туфайли алоҳида баҳо кўрсаткичлари билан қайд этилган эди, аслида Марказнинг фаолияти Адлия вазирлиги тизимида биргаликда баҳоланган. Шуни инобатга олиб, Марказ ушбу рейтингдан чиқарилди.

Шунинг билан бирга, рейтинг ижтимоий тармоқларда мазмунан нотўғри талқин қилинмоқда. Хусусан, рейтингда «қониқарсиз» деб баҳоланган ташкилотлар “коррупциялашган ташкилот” сифатида кўрсатилмоқда.

Ваҳоланки, мазкур рейтинг орқали қонунчилик ҳужжатларида коррупцияга қарши курашишга оид белгиланган талабларни ташкилотлар томонидан бажарилиши, яъни коррупцияга қарши курашиш ишларининг самарадорлиги баҳоланган.

Таъкидлаш жоизки, бирор бир ташкилотни «қониқарсиз» натижа қайд этганлиги унинг коррупциялашган ташкилот эканлигини англатмайди. Ёки аксинча, «яхши» деб топилган давлат ташкилоти фаолияти коррупциядан холи дегани эмас.

Давлат ташкилотларининг коррупциялашганлик даражаси эса коррупцион жиноятлар бўйича статистик маълумотлар, ижтимоий сўровлар орқали аҳолининг коррупцияни қабул қилиш идроки ва шу каби таҳлилий кўрсаткичлар асосида аниқланади.

Биз томонимиздан эълон қилинган рейтингни коррупцион жиноятларга умуман алоқаси йўқ. Қанча коррупцион жиноятлар содир этилгани, қанча зарар келтирилгани каби саволлар бу рейтинг предмети эмас. Шу боис учбу рейтинг бирор бир ташкилотни коррупциялашган деб баҳолашга асос бўлмайди.

ОАВ, журналист ва блогерлардан рейтинг баҳолаш натижалари бўйича давлат органлари ва ташкилотлари имижига путур етказувчи ҳамда жамоатчилик фикрини чалғитувчи маълумотлар тарқатмасликни сўраймиз.

Коррупцияга қарши курашиш агентлиги

Ахборот хизмати

1806 207 Босма версияси

Korrupsiyaga qarshi kurashish Axborot xizmati 08.04.2025

• Ҳаволадан нусха олиш