Namangan viloyatida investitsiya loyihalarini amalga oshirish doirasida ochiqlikni ta’minlash borasidagi ishlar o‘rganilmoqda
Материал пока опубликован только на языке: Özbekça
Davlatimiz rahbarining bir qator farmon va qarorlarida Korrupsiyaga qarshi kurashish agentligiga xalqaro moliya institutlari tomonidan ajratilgan kredit mablag‘larining maqsadli sarflanishida ochiqlikni ta’minlash bo‘yicha topshiriqlar yuklatilgan.
Mazkur vazifalar ijrosini ta’minlash maqsadida Agentlik direktori Akmal Burxanov boshchiligidagi ishchi guruh Namangan viloyatida loyiha doirasida amalga oshirilayotgan ishlar holati bilan tanishmoqda.

Ma’lumot uchun: Loyiha doirasida Farg‘ona, Andijon, Namangan, Jizzax hamda Sirdaryo viloyatlarining 21 ta tumanida qurilish ishlarini olib borish belgilangan. Loyihaning umumiy qiymati —183,6 mln AQSh dollari.
Loyiha doirasida viloyatning 5 ta (Yangiqo‘rg‘on, Chortoq, Pop, Chust va Mingbuloq) tumanidagi 132 ta mahallaga 66,4 mln dollar ajratilgan bo‘lib, joriy yil 1-aprel holatiga 32,23 mln dollar mablag‘ o‘zlashtirilgan.

Birinchi bosqichda 80 ta mahallada jami 177 ta subloyiha tanlab olingan.
Loyihani amalga oshirish davomida jamoatchilik nazoratini kuchaytirish maqsadida har bir mahalladan faol fuqarolar guruhlari shakllantirilib, mazkur fuqarolar subloyihalarni amalga oshirishning barcha bosqichlarida ishtirok etishi ta’minlanmoqda.

Ishchi guruh nazorat tadbirlari davomida Chust tumanidagi "Buloqboshi" hamda Pop tumanining "Eski to‘da" va "Obihayot" mahallalarida qurilayotgan sport inshootlari bilan tanishdi.

Mas’ullarga loyiha doirasida belgilangan ishlarni muddatlarda yakunlash bo‘yicha tegishli ko‘rsatmalar berildi.
Loyihani amalga oshirish davomida mablag‘larning maqsadli sarflanishi va bu jarayonlarda ochiqlikning ta’minlanishi bo‘yicha nazorat tadbirlari davom ettiriladi.
Korrupsiyaga qarshi kurashish agentligi
Axborot xizmati