O‘zbekiston MDH Korrupsiyaga qarshi kurashish bo‘yicha Davlatlararo Kengashga aʼzo bo‘ldi
Davlat rahbarining tegishli qaroriga asosan, O‘zbekiston Mustaqil Davlatlar Hamdo’stligi Korrupsiyaga qarshi kurashish bo‘yicha davlatlararo kengash tuzish to‘g‘risidagi bitimga rasman qo‘shildi.
Qarorga ko‘ra, Korrupsiyaga qarshi kurashish agentligi mazkur xalqaro shartnomani amalga oshirish uchun masʼul organ sifatida belgilandi va Agentlik direktori Kengash aʼzosi etib tayinlandi.
Kengash MDH Davlat rahbarlari Kengashiga hisobot beradi va yig‘ilishlari yiliga kamida bir marta o‘tkaziladi.
Kengashning ustuvor vazifalari:
- korrupsiyaga qarshi kurashish bo‘yicha maqsadli dasturlar va takliflar ishlab chiqish;
- aʼzo davlatlar o‘rtasida axborot almashishni yo‘lga qo‘yish;
- korrupsiyaga qarshi kurashish sohasida kadrlar tayyorlash va ularning malakasini oshirish;
- qo‘shma ilmiy-tadqiqot ishlarini tashkil etish orqali korrupsiyaga oid muammolarni hal qilish.
Mamlakatimizning ushbu Kengashga aʼzo bo‘lishi korrupsiyaga qarshi kurashish bo‘yicha milliy strategiyani yanada mustahkamlash, bu boradagi samaradorlikni oshirish va xalqaro hamkorlikni rivojlantirishga xizmat qiladi.
Korrupsiyaga qarshi kurashish agentligi
Axborot xizmati