Hududlarda korrupsiyaning oldini olish bo‘yicha tuzilgan Ishchi guruh Sirdaryo viloyatida o‘rganish o‘tkazdi
Sirdaryo viloyatida Korrupsiyaga qarshi kurashish agentligi direktori Akmal Burxanov va Bosh prokurorning birinchi o‘rinbosari Baxriddin Valiyev ishtirokida viloyatda korrupsiyaning oldini olish bo‘yicha tasdiqlangan “Yo‘l xaritasi” doirasida amalga oshirilayotgan ishlarning dastlabki muhokamasiga bag‘ishlangan yig‘ilish bo‘lib o‘tdi.

Yig‘ilishda sog‘liqni saqlash, taʼlim, bandlik, energetika, kadastr sohalarini raqamlashtirish, byurokratiyani qisqartirish, ochiqlikni taʼminlash bo‘yicha yangi mexanizmlar ishlab chiqish va ularni amaliyotga samarali joriy etish borasida masʼullar tomonidan amalga oshirilayotgan ishlar holati muhokama qilindi.

Muhokamalarda viloyatda ochiqlikni taʼminlash, manfaatlar to‘qnashuvining oldini olish bo‘yicha tushuntirish ishlari, fuqarolik jamiyati institutlarining korrupsiyaga qarshi kurashishdagi faolligini oshirish chora-tadbirlari yetarli darajada olib borilmayotganligi qayd etildi.
Ishchi guruh o'rganishlarida viloyatning 10 nafar mas'ul shaxslari (7 nafar hokim yordamchisi hamda 3 nafar boshqaruv xodimi) 11 ta tadbirkorlik subyektida taʼsischilik va rahbarlik asosida faoliyat yuritib kelayotgani aniqlandi. Tuman-shahar hokimliklarining rasmiy veb-saytida joriy yilning 1-choragi uchun mahalliy byudjet daromadlari, rejadan orttirib bajarilgan qismiga oid maʼlumotlardan boshqa biron-bir ijtimoiy ahamiyatga molik maʼlumotlar joylashtirilmagan. Bundan tashqari, o'tgan yili Xalq deputatlari viloyat va tuman (shahar) Kengashlarining 206 ta sessiyasidan 114 tasi yoki 55 foizi transllyatsiya qilinmagan,
— dedi Akmal Burxanov.

Yig‘ilishda shu kabi kamchiliklarni kechiktirmasdan bartaraf etish, shuningdek, “Yo‘l xarita”da belgilangan topshiriqlarni o‘z vaqtida va sifatli amalga oshirish lozimligi taʼkidlandi.
Shuningdek, Ishchi guruh Guliston shahridagi Shoshilinch tibbiy yordam ko‘rsatish Respublika ilmiy markazi filiali va 10 ga yaqin tibbiyot muassasasini yagona boshqaruv asosida birlashtirib tashkil etilgan “Guliston tibbiyot klasteri” faoliyati bilan tanishdi.

Hozirda “Tibbiyot klasteri”da shifokorlarni qog‘ozbozlikdan xalos etish uchun barcha jarayonlar raqamlashtirilgan bo‘lib, buning natijasida korrupsiyaviy xavf-xatarlar oldi olinishiga erishilmoqda.

Mazkur sohada aholi duch kelayotgan boshqa muammo va to‘siqlar xususida masʼul rahbarlar bilan birga muhokama qilindi va ularni tezkor bartaraf etish, kelgusida yo‘l qo‘ymaslik yuzasidan zarur chora-tadbirlar belgilab olindi.
Korrupsiyaga qarshi kurashish agentligi
Axborot xizmati