Қурилиш ва уй-жой коммунал хўжалиги соҳасида коррупцияга қарши 30 кунлик фавқулодда ҳолат белгиланди
Бугун Қурилиш ва уй-жой коммунал хўжалиги вазирлигида вазирлик марказий аппарати, Коррупцияга қарши курашиш агентлиги масъул ходими — вазирликнинг комплаенс-назорат бўлинмаси раҳбари, тизим ташкилотлари ҳамда ҳудудий бошқармалар раҳбар ва масъул ходимлари иштирокида коррупция билан боғлиқ ҳолатлар юзасидан танқидий йиғилиш ўтказилди.
Унда коммунал соҳада юзага келаётган тизимли камчиликлар, хусусан, “Шаффоф қурилиш” платформаси орқали қатор йўналишлар рақамлаштирилганига қарамай, айрим жараёнларда инсон омилининг сақланиб қолаётгани кескин танқид қилинди.
Бу борада камчиликларга йўл қўйган бошқарма раҳбарларига нисбатан интизомий чоралар кўрилди, жумладан, ҳайфсан эълон қилинди.
Йиғилишда мавжуд муаммоларни қисқа муддатда бартараф этиш мақсадида 30 кунлик фавқулодда ҳолат жорий этилиши белгиланди.
Мазкур даврда коммунал соҳанинг барча йўналишларини тўлиқ рақамлаштириш, инсон омилини максимал даражада чеклаш бўйича аниқ вазифалар юклатилди.
Топшириқлар ижросини кечиктирган ёки сусткашликка йўл қўйган масъулларга нисбатан қатъий чоралар қўлланилиши ҳақида огоҳлантирилди.
Йиғилишда коррупцияга қарши муросасиз ёндашувни кучайтиришга қаратилган устувор вазифалар белгилаб олинди.
Эслатиб ўтамиз, ҳуқуқий эксперимент доирасида Қурилиш ва уй-жой коммунал хўжалиги вазирлигининг коррупцияга қарши ички назорат бўлинмаси Коррупцияга қарши курашиш агентлигига ўтказилган.
Коррупцияга қарши курашиш агентлиги
Ахборот хизмати