Ўзбекистон делегацияси Ислом ҳамкорлик ташкилотининг Коррупцияга қарши курашиш органлари иккинчи вазирлар йиғилишида иштирок этди
Коррупцияга қарши курашиш агентлиги директори Акмал Бурханов бошчилигидаги Ўзбекистон делегасияси жорий йилнинг 26-27 ноябрь кунлари Қатарнинг Доҳа шаҳрида бўлиб ўтган Ислом ҳамкорлик ташкилоти(ИҲТ)нинг Коррупцияга қарши курашиш органлари иккинчи вазирлар йиғилишида иштирок этди.
Ҳар икки йилда бир марта ўтказиладиган ушбу тадбирда ИҲТга аъзо-давлатлар аксилкоррупция идораларининг коррупцияга қарши ҳамкорлик тўғрисидаги Макка конвенциясини қўллаш доирасини янада кенгайтириш, минтақавий ва халқаро ҳамкорлик алоқаларини ривожлантириш масалалари эътибор марказида бўлди.
Йиғилиш доирасида делегациямиз Саудия Арабистони ва Индонезиянинг коррупцияга қарши курашувчи ваколатли органлари, шунингдек, Халқаро аксилкоррупция академияси раҳбарияти билан учрашувлар ўтказди.
Мулоқотлар мобайнида Ўзбекистонда Президент Шавкат Мирзиёев бошчилигида амалга оширилаётган аксилкоррупция ислоҳотлари тўғрисида хорижий томонга маълумот берилиб, ўзаро тажриба алмашиш механизмлари ҳамда истиқболдаги режалар атрофлича муҳокама қилинди.
Хусусан, коррупцияга қарши курашиш бўйича махсус ўқув курсларини ташкил этиш, коррупцияга қарши курашишнинг турли йўналишларида қўшма лойиҳаларни йўлга қўйиш, Агентлик томонидан режалаштирилаётган ва амалга оширилаётган лойиҳаларда техник, методик ва экспертлик кўмаги кўрсатишга келишиб олинди.
Коррупцияга қарши курашиш агентлиги
Ахборот хизмати