“Коррупцияга қарши курашиш бўйича хакатон” ғолиблари тақдирланди
Хабарингиз бор, Агентлик томонидан IT-Park, "Янги Ўзбекистон" университети ва “Навоий кон-металлургия комбинати” АЖ ҳамкорлигида “Коррупцияга қарши курашиш хакатони” ташкил этилган эди.
2 май куни старт берилган хакатон бугун ўз ниҳоясига етди. 3 кун мобайнида 150 га яқин ёш дастурчи ўзаро беллашди.
Финал босқичида жамоаларнинг лойиҳалари юзасидан тақдимот ва дастурий маҳсулотлари экспертлар томонидан баҳоланди.
Хакатон шартларига кўра, иштирокчилар томонидан очиқ маълумотлардан фойдаланган ҳолда қуйидаги йўналишларда оид ечимлар ишлаб чиқилди:
- давлат харидлари, спорт,қурилиш, молия ва суғурта тизимларида коррупциянинг олдини олиш;
- коррупцияга қарши курашишга аҳоли ва ёшларни жалб этиш;
- очиқ маълумотлар орқали коррупцияни камайтиришга қаратилган бошқа ёндашувлар.
Хакатон якунига кўра қуйидаги жамоалар ғолиб деб топилди:
1-ўрин “Uzinfocom” (Давлат харидларида манфаатлар тўқнашувини олдини олиш);
2-ўрин «Equilibrium” (Сунъий интеллект ёрдамида манфаатлар тўқнашувини аниқлаш);
3-ўрин “Austrum team” («Ҳаж» ва «Умра» зиёрат тадбирларини ташкил этиш жараёнларини рақамлаштириш).
Танлов ғолиблари ташкилотчилар томонидан эсдалик совғалари билан тақдирланди.
Ғолиб жамоа жорий йилнинг сентябрь ойида Гонконгда бўлиб ўтадиган Осиё ёшлар коррупцияга қарши курашиш хакатони (“Coding4Integrity”)да Ўзбекистон номидан иштирок этиш имкониятини қўлга киритди.
Коррупцияга қарши курашиш агентлиги
Ахборот хизмати